Marhaban ya Ramadan

Posted on

Cae Azwardi

[Atjeh Post, 26 Juli 2012]

buleuen mulia ka trôk geugisa
sya’ban jibungka gantoe ramadan
cukôp jai pahla soe nyang puasa
meu-ampôn dèsya meutuah badan

jak tajak sambôt buleuen puasa
ngön ruh bahgia jiwa beuseunang
beumangat até beulapang dada
lagè gembira bak uroe meugang

bak buleuen ra’jab tapeuluen badan
‘ôh trôk bak sya’ban tapeutrang até
tapeugléh nyawöng dalam ramadan
peule ‘amalan keu pangkai maté

talakè meu’ah bak handai tolan
mungkén na rakan meusantök desya
mangat meusaneuet tapujoe tuhan
teuentè jroh badan bak tapuasa

susôn rencana pubuet ‘amalan
uroe ngôn malam peule ‘ibadah
tipèk bak bintéh jadwal mumacam
‘amai tagulam peujôk bak Allah

beutrôh puasa sibuleuen punoh
beutameuseunoh baca quru-an
seumayang limöng beu-ék jama’ah
beule seudeukah bagi makanan

geuyue theuen nasu kön hanya pajôh
beutatém peutrôh u dalam dada
pubuet ‘ibadah beuseuenggôh-seuenggôh
wajéb tapeutrôh sunat taganda

buleuen nyo geubri leupah jai rahmah
tamah magfirah keu ampôn dèsya
‘itikumminannar beujeuet tareupah
peulepah badan nibak nuraka

uroe nyo mantöng lam akhé sya’ban
singöh ramadan puphôn puasa
marhaban ya syahru ramadan
ya syahrassiam peuet blah lhèe tiga

(Meunasah Papeun, Sya’ban 1433 H)

Azwardi, Dosen FKIP Unsyiah

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s